شوهاز
جند ءِ بجار ءَ نزانئے تو عالم ءِ گپ ءَ کنے
راہ وتی گار کُتگ کپتگے شونزانی تھاں
ششگے لوگ ءَ مہ نند مردماں سنگ مجاں
توکاں آزمان ءَ جنے جند ءِ دیم ءَ تی کپاں
نئے شھر بانور ناں تو مئے گُلی
گیتانجلی ڈے گیتانجلی
وتی دود ءُ رسم ءُ رواج ءَ شمُش
برو دیر مَلک ءَ تو دگرے بہ بی
گُشاں بولی وشیں اگاں جندے بدیں
وتی راھا یل داں آہ مردم ردیں
چین ءَ بچار تو کہ ژاپان نبی
دگرے ڈگار ءَ تی راں مان نبی
وتی سر ڈگار ءُ زبانیں وتی
وتی گُشتگیں گال بیانیں وتی
جندے تی چاگرد تئی جنتیں
کوش تی صباے تی روچ برکتیں
یے مھلوک ءُ مردم یے بے حرکتیں
فقیر ءُ گداھیں درْوھیں بے وتیں
وتی بولیاں ماں چتو یل کناں
ماں بگال ءُ گورے کہ رند ءَ تچاں
ابابگر ءُ عزت منا ھنکاھاں دوست
سید دوستیں تچکیں وتی راں دوست
مناں دوست وتی رسم مناں دوست رواج
وتی کاڑ گزالیں دل ء ِ تخت ءُ تاج
ماں شیدا زبان ءِ ماں لبز ءِ ھدوک
وتی چم دوستاں وتی چم ءِ روک
مناں تو شگاناں مجاں دلبرے
پمن شعر وشاں گُلیں ساحر ے
زبان دُر بیانیں بلوچی منی
منی باندات ھمیش ءُ مروچی منی
منی لبز ءُ گپتار بیانیں ھمیش
پمن گنج ءُ گوھر پمن کم ءُ گیش
زبان زندگ بات ءُ سلامت ببات
میاریگ باں شوھاز ملامت ببات
غلام حسین شوھاز
