زاهدان

مبارک کازی شعر

زاھدان

ھون ھاری شیپ گران اِنت، کربلا اِنت زاھدان اِنت
ھر بلوچ تیر ءِ نشان اِنت، کربلا اِنت زاھدان اِنت

پہ اے پاتْراپاں نہ ھلّ ایت جُنز راجی آجوئی ءِ
کاروان راہ ءَ روان اِنت، کربلا اِنت زاھدان اِنت

جھل ءَ پُر ھونیں زمین انت گوں وتی زوراکیاں گوں،
بُرز ءَ نیلّیں آزمان اِنت، کربلا اِنت زاھدان اِنت

چو یزید ءَ مان آتکگ دشمن ءِ زوراکیں لشکر،
چو ھُسین ءَ ھر جوان اِنت، کربلا اِنت زاھدان اِنت

اے کلم کہ لنککاں گوں کسّھاں درشان ایت کازی،
المّ ءَ تئی دست مان اِنت، کربلا اِنت زاھدان اِنت

مبارک کازی