بیا او مرید
بیا او مرید، بیا او مرید، بیا او مرید دیوانگیں
بیا بیا کہ دیوانے کنوں، مولانگ و مستانگیں
سوتکگ ترا عشقءِ زراب، مارا غماں کرتگ کباب
تو ھانلءِ درداں زرئے، ما پہ وطن جانانگیں
چاکر تئی دوستءَ پلت، چما دگہ ڈنگاں وطن
تو سر پہ شیدائی شتئے، ما پیھناں زنداگیں
تو ھانلءَ اِشت و شتئے، ماڑیءَ میریں چاکرءِ
ما ھانلءِ ملکءَ ندوں، جوریں بدان دلمانگیں
اِشتے وطن پہ مکہءَ، لوچیں ملنگاں گوں شتے
مئے مکہ و ماس اِنت وطن، نیلوں وطن شاھانگیں
پردیس تو? ماں مکہءَ، شیئراں زھیرنالیں جتئے
ما کپتہ زندانءِ تھا، شیئراں جنوں رندانگیں
ھجرءِ چہ درد و دوریاں، بند بند وتی داغ داتگے
مئے بند و بنداں سوھتگنت، جوریں بدان مستانگیں
تو زرتہ کچکول و عصا، کوڑیں جھاں داتگ یلہ
در کپتگوں سربازیءَ، ماپہ پڑا مردانگیں
فرق ھچ نہ اِنت میگ و تئی، دردءَ و زردءِ آچشءَ
تو ھانلءِ عشقءَ گنوک، ما پہ وطن دیوانگیں
ماں شیئرو عشقءِ دپتراں، دانکہ جھان ھست اِنت توئے
ما ھم جھانءَ یات بوں، مں مجلساں پروانگیں
پُلیّں مرید، پُلیّں مرید، بیا گوں فقیری باطنءَ
گوشدار شیئراں شکّلیں، گوشتگ نصیر دیر زانگیں
از زندگینامه گل خان نصیر هم بگویید با تشکر~برازپور
اینجا
http://balanch.ir/1390/12/07/1419/