دوست دارین
شعری چه واجه مرحوم استاد عبدالرحمن پهوال – بلوچ شاعر – اوگانستان
دوست دارین دیدگان چو
من وتی ماتی دیاری
دشت و لوتین ریکسارا
باگ و سبزین نیزارا
دوست دارین دیدگان چو
سرومگین هاکانا آیی
نیوگ و آپانا آیی
آیی هور گرند و گروکان
مست و گج شانین رودان
صاف وسبزین آسمانی
چرگ وسیل شکاری
دوست دارین دیدگان چو
آییی دیرین سارو تارا
موسم و وشین بهارا
ریسگین سیاهین گدانان
پراه و سبزین دش و میدان
ترند و تیزین ماریانا
مست و کوهین لیروانا
میش وبگانی دوارا
شیوانی پاسو وختا
شوانگ شیپول توارا
گرم و جان سوچین لواری
لور و گواتی
سبزگ و کشت وکشاری
تاری و شامو غروبا
سرسرین گوات و هوای
دوست دارین دیدگان چو
آیی هلمند ،شیلگ و خاشرود امستین
مارگوی پت دور دستین
پزوکی هامون موجین
جاندمی جولین دشتا
کهنگین برزین کلاتا
گوستگین نام ونشان و
زندگین تاریخ و نکلی
دوست دارین دیدگان چو
آیی عزت آیی ننگا
آیی پتی مرو جنگا
آیی سولوآیی سوبا
آیی بزگر ومزور و خواری
دوست دارین دیدگان چو
تهارین آیی شپانا
آیی آباتی و راهانا
سکی و رنج و غمانا
ننگرین مرداناآیی
لج پالین کادانا آیی
آباتین گراز مانی
باندی روچی روشنین استارا آیی
آباتین آیوکا آیی
دوست دارین دوست دارین
من وتی چو سر و ماهی
